صاریقلی كوچك كنچ
خلوصی بگ ، ١٩٢٩ ییلنده استاد بديع الزماني بارله ده زیارت ایتدكدن أوچ كون صوڭره رسالۀ نور خدمتنڭ استقبالی ایله علاقه دار بر رؤیا كورمش و أوچ سنه صوڭره یازدیغی بر مكتوبله بو رؤیایی استادنه بیلدیرمشدی . رؤیایی غایت معنیدار كورن بدیع الزمان حضرتلری بر قسمنی تعبیر ایدرك مكتوباتده كي رؤیا بحثی ایچنه آلمشدی . او تعبيرڭ صوڭ قسمنده استاد شویله دییوردی :
صاریقلی كوچك كنچ بر ذات ایسه ؛ خلوصييه اوموز اوموزه ویره جك بلكه كچه جك بریسی ، ناشرلر و طلبه لر ایچنه كیرمگه نامزددر . بعضیلرینی ظن ایدرم ، فقط قطعي حكم ايده مم. او كنچ ، قوۀ ولایتله میدانه آتیلاجق بر ذاتدر . 1
خلوصی بگی گچن طلبه
استاد بدیع الزمان حضرتلری ، بو رؤیایی تعبیر ایتدكدن صوڭره ، خسرو افندی و خلوصی بگه يازديغي بر قاچ مكتوبله ، او رؤیاده كوریلن و خلوصی بگي گچه جك كنجڭ خسرو افندی اولدیغنی مژده له ین شو افاده لری قلمه آلدی :
بِاسْمِه۪ وَاِنْ مِنْ شَيْءٍ اِلاَّ يُسَبِّحُ بِحَمْدِه۪اَلسَّلاَمُ عَلَيْكُمْ وَ رَحْمَةُ اللهِ وَ بَرَكَاتُهُ
مبارك صدّیق قرداشم خسرو !
ان شأ اللّٰه سوزلرڭ مطالعه سندن آلدیغڭ حصّه و فیض ، دنیانڭ مصیبتلرینه الملرینه قارشی كافی بر سپردر . اوت ، دنیا اگر دائمي اولسه ایدی ، انسانلر ایچنده حقيقي فاعل مختار اولسه ایدیلر ، پدرلر اولادلرینه حقيقي مالك اولسه ایدیلر ، بن ده سنڭ الملی حسیاتنه اشتراك ایده جكدم . 2 فقط سڭا پك آغیر كورونن او اهمّیتسز دنیا شیلری ؛ سنڭ چلیك كبی قلبڭ ، فكرڭ صارصيلماملي . هم اڭ مقدّس بر وظيفه ڭ اولان خدمت قرآن سڭا هرشیئه قارشی بر تسلیدر ، بر سوینچ ، بر سرردر ؛ سڭا بو یتر .
قالدی شرعي جهتي ؛ سنڭ تقواڭله وجداننی توكیل ایدییورم . دنیا جهتنی ایسه سن بندن داها ایی بیلییورسڭ . جناب حقّه شكر ایدییورمكه سنی بنم كبی مجرّد ( بكار ) بیراقوب صرف قرآنه خدمتكار ایدییور . بو دفعه بڭا یازدیغڭ مسائل متفرّقه پارچه سی او قدر كوزلدركه بڭا بو فكری ویردی : بعض كوچكلری خسروه يازديرمق ، یادگار اولارق یانمده محافظه ایتمك !
هر نه ایسه ، سزه برميژده وره جگم. خلوصي بگڭ قسمًا تعبیری چیقمش بر صادق رؤیاسنده محرابده بنم یانمده كندندن داها كنچ بریسنی كندندن داها ایلری كورمش . بنم ظنمجه سز او آدم اولمغه نامزدسڭز . ال باقي هوالباقی
” قرداشڭز سعید نورسی “ 3
بِاسْمِه۪ سُبْحَانَهُ وَاِنْ مِنْ شَيْءٍ اِلاَّ يُسَبِّحُ بِحَمْدِه۪
اَلسَّلاَمُ عَلَيْكُمْ وَ عَلٰي وَالِدَتِكُمْ وَعَلٰي اَخ۪يكُمْ وَ اِخْوَتِكُمْ بِعَدَدِ حُرُوفِ مَاكَتَبْتَهُ ف۪ي خِدْمَةِ الْقُرْاٰنِ
بختیار صدّیق قرداشم و بو خدمت قدسیه ده فداكار حقيقي بر آرقداشم !
بو دفعه كی مكتوبيڭزخلوصي بگڭ معلومڭز اولان رؤیاسنده ، ” بندن كنچ بریسی ، بندن داها ایلری ، غیبدن هدایایی كتیرمگه واسطه بر آرقداشمز اولاجق “ فقره سنی تعبیر ایدییور كبی كورونویور . اوت قرداشم ، اشارات الاعجازڭ تأليفنده بنم اڭ خاص و خالص و یوكسك كاتبم و طلبه م اولان ملّا حبيب شهيد ، او زماندن بری اڭ درین قلبمده اونڭ یرینی طوتاجق و تسلّی ویره جك و اوڭا بڭزه یه جك رحمت الهیه دن ایسته یوردم . فلله الحمد ، سز چوق جهتلرله او حبيبسڭز ، اوڭا تام بر خير الخلفسڭز . او ذات مقبولیندنمش . فقط او بیلمدن كیتمش . هم قهرمانجه سنه شهادت مرتبه سنی قزانمش . عالم برزخده ظن ایدرم سزه باقییور . بنی یالڭز بيراقمديغڭز ایچون ممنون اولویور . سنڭ و لطفي و رشدی و رأفت بگڭ مكتوبلریڭزی یگرمی یدنجی مكتوبڭ ( بارله لاحقه سينڭ ) قسمًا ذیلنده درج ایتمك ایسته یورم .
شخصمه عائد حدمدن فضله توجّهيڭزي دخی یینه انوار قرآنيه يه دور ایدوب أویله قبول ایدییورم . یوقسه بن كندیمی او فضله توجّهيڭزه لایق كوره مییورم . اللّٰهه شكردن باشقه مابینمزده منتدارلق اولسه سز بڭا دگل بن سزلره قارشی صرف ايتمگه كندیمی بورچلی بولویورم .
ال باقي هوالباقی
قرداشڭز سعید نورسی 4
خلوصی بگ رؤیاسنی آڭلاتییور
یینه بر كون اگیردیرده بولوندیغم زمان ، رؤیاده صاریقلی بر كنچ كوردم . بو كنچ بنی ایلك دفعه ، حضرت . استاده گوتورن مجذوب لقبلی مصطفی افندی ایدی . اوڭا شیخ ویا حافظ مصطفی دە دينيردي . رؤیاده كوردیگم صاریقلی كنچ شكلاً او ایدی . فقط نه بييغي و نه ده صقالي واردی . حافظ مصطفی ، چوجق مشربنده بریسی ایدی . رسالۀ نورڭ ایلك كوچك سوزلرنى ١٩٢٨ ‘ ده اونده كورمشدم . داها او زمان استاد حضرتلریله ده معارفه مز ( طانيشمه مز ) يوقدي . غایت انتظامسز بر یازی ایله یازیلمش ایلك رساله یی اونده كورمشدم . مسودّه حالنده يدي . رؤیاده ، ألنده لبلبی طبله سي واردی . فقط ایچنده لبلبی غایت آزدی . بن لبلبيدن آلمق ایچون ألمی آتدم . او زمان لبلبی طباغي طولدی ، طاشدی . 5
” بو خسرو ، او آدمدر “
استاد بدیع الزمان حضرتلری ، یوقاریده كی ایكی مكتوبده خسرو افندی حقّنده اشارت ایتدیگی مژده یی ، بحثی كچن رؤیانڭ صاحبی اولان خلوصي بگه ده شو افاده لرله بیلدیردی :
غيّور ، صدّیق ، جدّی ، خالص آخرت آرقداشم و خدمت قرآنیه ده قوتلی آرقداشم خلوصی بگ !
. . . بو دفعه سزه یازدیغمز اعجازلي قرآن حكیمڭ جزؤلرندن نمونه ایچون اون سكزنجی جزؤي گوندردم . فقط داها حاشیه لری یازیلمدی . سنڭ طالعينمشكه بو جزؤ مكرّر یازیلمش . بونی یازان خسرو نامند كنچ بر قرداشمزدر . عربی خطی يوقدي . قرآنڭ كرامتی اولارق بردن باشلادی بو صورتی آلدی . شیمدی یه قدر یگرمیدن فضله جزؤلري او یازدی .
سنڭ اسكیدن كوردیگڭ رؤیا ایچنده سندن كنچ داها ایلری بر ذات ، محرابڭ غیبی طرفندن هدایایی كتیروب ویردیگنی ، - بن ده اونی أویله تعبیر ایتمشدم - اللّٰه اعلم بو خسرو ، او آدمدر . 6 اسكیدن معاشی واردی ، سوزلری اوقودقدن صوڭره ترك ایتدی . یڭیدن اللی لیره معاشی ویروب كونده ایكی أوچ ساعت چالیشدیرمق ایچون ویردیلر . بیڭ لیره دە اولسه سوزلرله مشغوليتمي ترك ایتمم ، دییوب او معاشی رد ایتدی . . . . باشده پدریڭز ، فتحی بگ ، كمال الدین ، خواجه عبد الرّحمن ، امام عمر افندیلر اولارق سوزلره علاقه دار اولانلره سلام و دعا ایدییورم .
سعید نورسی 7
عثمانلیجه مكتوبات ، ص . ٢٢٨
خسرو افندی ، استادله طانيشديغي عین سنه ، ٢ تمّوز ١٩٣١ ‘ ده اولنمش ، فقط خانمي او سنه ایچنده آیریلوب تك چوجقلرینی ١٩٣٢ ییلنده كندی باباسنڭ اونده دنیایه كتیرمشدر .
خیرات وقفی آرشيوي
خیرات وقفی آرشيوي
صوڭ شاهدلر ، ج . ١ ، ص . ٣٣٠
مصطفی صونغوردن نقلاً : ” اگردیردن خلوصي آغابگ شرقه كیتدیگنده ، ( بدیع الزمان حضرتلری ) اوڭا یازدیغی مكتوبده ایسه : ‘ قرداشم خلوصي او رؤیاده كوردیگڭ ، خسرو نامند بر كنچدر . عینًا او صاریقلی كنچ معناسنی كوسترييور‘ دیمشدی . “ ( مصطفی صونغور ، ص . ١٤٢ )
خیرات وقفی آرشيوي